اسلام آباد (ویب ڈیسک) آئی جی موٹرویز نے ہدایت کی ہے کہ تیز رفتاری کی مرتکب گاڑیوں کو ہر صورت تعاقب کرکے روکا جائے گا ، تیز رفتاری کرنے اور نہ رکنے والے ڈرائیورز کو بھاری جرمانے ہوں گے۔
آئی جی موٹرویز خالد محمود کا کہنا ہے کہ موٹروے پولیس تیز رفتار ڈرائیونگ کو مؤثر طریقے سے روکنے کے لیے پرعزم ہے۔ موٹروے پولیس کا مشن انسانی جانوں کو حادثات سے بچانا ہے۔ افسران قانون کے یکساں نفاذ کو بلا تفریق یقینی بنائیں۔ آئی جی موٹرویز خالد محمود نے کہا کہ جدید ٹیکنالوجی کے استعمال سے ٹریفک قوانین کی خلاف ورزی کرنے والوں سے سختی سے نمٹاجائیگا۔ قومی شاہراؤں اور موٹرویز پر قانون کی خلاف ورزی کرنے والوں سے رعایت نہ کی جائے۔ باڈی وارن کیمرے پاکستان کی تمام قومی شاہراؤں پر فعال کئے جا رہے ہیں۔ جدید آلات سے لیس افسران (اسپاٹرز)ٹریفک قوانین کی خلاف ورزیوں کو چیک کر رہے ہیں۔
موٹر ویز پر سفر کرنیوالا ہر شہری قابل احترام ہے۔ موٹروے پولیس قومی شاہراؤں پر سفر کرنے والے مسافروں کی جان و مال کی محافظ ہے ۔ترجمان موٹروےپولیس کا کہنا ہے کہ ڈرون ٹیکنالوجی کی مدد سے پیٹرولنگ کومزید موثر بنانے کی ہدایت دی گئی ہے۔ مسافر بردار گاڑیوں کی کمپنیوں کا ڈیٹا پی ایس وی مینجمنٹ سسٹم میں محفوظ کیا جارہاہے جبکہ مسافر بردار گاڑیوں کے مسلسل تیسری لین استعمال کرنے پرڈرائیورزکو سخت قانونی کاروائی کا سامنا کرنا پڑے گا۔ بسوں کی ٹریکنگ،ڈرائیورز کی ضروری معلومات کا ریکارڈ بھی مرتب کیا جارہا ہے۔ گاڑیوں کی رجسٹریشن،روٹ پرمٹ سمیت اہم دستاویزات کا ریکارڈ بھی محفوظ کیا جارہا ہے۔ جدید ٹیکنالوجی کا بہتر استعمال حادثات اور قیمتی انسانی جانوں کے نقصان کو روک سکتا ہے۔
